Gostivar, 6 Shkurt 2025 – Artisti i njohur nga Gostivari, Hajdar Hajdari (Da Lee), ka reaguar pas publikimit të listës së projekteve të mbështetura financiarisht nga Ministria e Kulturës, ku sipas tij dhe shumë artistëve të tjerë shqiptarë, diskriminimi është i dukshëm. Në një postim në profilin e tij në Facebook, ai ka bërë të ditur se koncerti tradicional “DaLee & Friends III” do të mbahet pavarësisht mungesës së mbështetjes nga institucionet shtetërore.
“Duke marrë parasysh rezultatet e programit vjetor të M.K., të cilët nuk e kanë parë të arsyeshme mbështetjen financiare të koncertit ‘DaLee & Friends III’, më lejoni të ju informoj se koncerti do të realizohet. Bashkë me ‘Friendsat’ kemi mjaftueshëm përkrahje nga publiku dhe kapacitete artistike e teknike për ta sjellë këtë edicion të tretë!”, ka shkruar Hajdari.
Sipas statistikave të publikuara, nga projektet e shumta të aplikuara nga artistët shqiptarë, vetëm një përqindje shumë e vogël – më pak se 15% – kanë marrë mbështetje financiare nga Ministria e Kulturës. Kjo ka ngritur shqetësime dhe kritika të shumta për mungesën e transparencës dhe barazisë në shpërndarjen e fondeve publike për kulturën.
Koncerti “DaLee & Friends” është një ngjarje e rëndësishme kulturore që ka mbledhur artistë të njohur ndër vite, duke promovuar muzikën dhe artin shqiptar. Pavarësisht sfidave financiare, Hajdar Hajdari dhe ekipi i tij janë të vendosur ta mbajnë këtë edicion të tretë, duke treguar se mbështetja e publikut dhe pasioni për artin janë më të fuqishme se pengesat institucionale.
Mbetet për t’u parë nëse institucionet përgjegjëse do të reagojnë ndaj këtyre shqetësimeve apo nëse artistët shqiptarë do të vazhdojnë të përballen me sfida të tilla në të ardhmen.