Zëvendëskryeministri i parë, Artan Grubi i cili sot mori pjesë në ceremoninë zyrtare të One Stop Shop-it, pikëkalimit kufitar të përbashkët ndërmjet Maqedonisë së Veriut dhe Shqipërisë, ka shpërndarë disa fotografi nga ngjarja në faqen e tij zyrtare në Facebook.
Grubi shkruan se ky projekt shënon një bashkëpunim të madh ndërmjet dy vendeve dhe se me projektet e tilla nuk mbarojnë këtu por vazhdojnë deri në largimin e plotë të kufijve.
Statusi i plotë:
Ditë e madhe sot në kapitullin tonë të bashkëpunimit me Republikën e Shqipërisë! Filloi së funksionuari vendkalimi i përbashkët kufitar me vetëm një pikë kontrolli (One Stop Shop) në Qafë Thanë.
Sot thyejmë një tjetër barrierë për komunikim më të lehtë dhe efikas mes nesh, i hapim rrugën një dimensioni të ri të bashkëpunimit duke lehtësuar dhe thjeshtësuar qarkullimin e qytetarëve dhe mallrave midis vendeve tona.
Shpreh mirënjohje ndaj të gjitha instancave institucionale në vendin tonë që kontribuan për realizimin e këtij projekti, ndaj autoriteteve në Republikën e Shqipërisë, për shkak se nuk u bënë as tre javë nga vizita e kryeministrit Edi Rama në Shkup, kur u betuam bashkërisht se do ta realizojmë vendkalimin e përbashkët kufitar me Republikën e Shqipërisë në Qafë Thanë dhe tash në më pak se tre javë kjo është realitet.
Nuk do të ndalemi këtu! Të gjitha kufijtë tonë duhet të kenë “One-stop-shop”, si para-akt deri te largimi i kufijve përgjithmonë midis nesh.