Presidenti amerikan, Joe Biden, ka informuar liderët e grupit të shtatë shteteve më të industrializuara, se Uashingtoni do të mbështesë dërgimin e aeroplanëve të avancuar luftarakë F-16 në Ukrainë dhe do të përkrahë përpjekjet për të trajnuar pilotët e Kievit. Lajmi bëhet i ditur nga mediat amerikane që citojnë një zyrtar të Shtëpisë së Bardhë.
Ky qëndrim dërgon sinjal të rëndësishëm të Kievit, i cili vazhdimisht e ka kërkuar përkrahjen e Perëndimit për sigurimin e aeroplanëve luftarakë, teksa e lufton pushtimin rus. Më herët, udhëheqësit e G7 ranë dakord të ashpërsojnë sanksionet kundër Rusisë dhe premtuan mbështetje financiare për Ukrainën.
Në një deklaratë të përbashkët liderët kërkuan që Rusia të tërheqë menjëherë, plotësisht dhe pa kushte trupat dhe pajisjet e saj ushtarake nga i gjithë territori i Ukrainës. Sipas tyre, nuk mund të ketë paqe, pa tërheqjen e ushtrisë ruse. Udhëheqësit ranë dakord se mbështetja për Ukrainën do të vazhdojë.
Në mesin e sanksioneve të vendosura në samitin e Hiroshimës, përfshihen eksportet e makinerive industriale, veglave dhe teknologjive të tjera që Rusia përdor për të vijuar luftën e saj në Ukrainë. Liderët thanë se duhen shtuar përpjekjet për kufizimin e të ardhurave ruse nga tregtia e saj me metalet dhe diamantet.
Ndryshe nga samitet e tjera kur presidenti i Ukrainës ka folur me video-konferencë këtë herë Volodymyr Zelensky do të jetë i pranishëm në samit, të dielën.
Oleksiy Danilov, sekretari i Këshillit të Sigurisë Kombëtare dhe Mbrojtjes së Ukrainës, deklaroi se pjesëmarrja e tij është absolutisht e rëndësishme për mbrojtjen e interesave të Ukrainës.
Zelensky ndodhet në një vizitë në Arabinë Saudite. Ky shtet i ka rezistuar qasjes së Perëndimit për vendosjen e sanksioneve ndaj Rusisë, me të cilën ka mbajtur marrëdhënie të mira duke ruajtur pozicionin neutral në konflikt. Kryeministri japonez, Fumio Kishida tha se zgjodhi Hiroshimën për zhvillimin e samitit si mesazh kundër posedimit të armëve bërthamore nga Rusia.
Klan News