NATO nuk mund të pranojë anëtarë të rinj që janë aktualisht të përfshirë në luftë, tha të enjten ministrja e Jashtme gjermane, ndërsa ministrat e jashtëm të vendeve anëtare të aleancës ushtarake takohen në Oslo.
“Politika e dyerve të hapura të NATO-s mbetet në fuqi, por në të njëjtën kohë është e qartë se nuk mund të flasim për pranimin e anëtarëve të rinj (të cilët janë) në mes të një lufte,” u tha Annalena Baerbock gazetarëve përpara bisedimeve jozyrtare.
Deklaratat e saj erdhën pasi presidenti ukrainas Volodymyr Zelensky tha të enjten se vendi i tij është gati të bashkohet me aleancën e mbrojtjes.
Baerbock tha se takimi në Oslo është një hap tjetër përpara samitit të liderëve të NATO-s në Vilnius, Lituani, të planifikuar për në korrik, i cili synon të nxisë marrëveshjen se si të forcohen marrëdhëniet me Kievin.
Baerbock tha gjithashtu se NATO pret të mirëpresë Suedinë si një anëtare të re në samitin e Vilnius.
Kërkesa e Suedisë për anëtarësim, edhe pse e mbështetur nga shumica e anëtarëve të NATO-s, deri më tani është penguar nga Turqia dhe Hungaria.
Anëtarësimi i Suedisë do të jetë një temë kryesore në takimin e ministrave të jashtëm këtë javë, tha më herët të enjten sekretari i jashtëm i Mbretërisë së Bashkuar.
